Komunikado Rijksdienst Carïbisch Nederland Jopie Abraham a anuncia su retiro como lider di DP Jopie Abraham ta baha komo lider politiko Intento di robo di ATM Komunikado Fundashon Sebiki Chapi di lucha No tin polis riba caya den oranan de madruga FFB ta exclui nos for di informashon di torneo clasificarorio Politiconan conoce municipio di Rincon solamente den tempu di elecshon
Rijksdienst Carïbisch Nederland ta kita empleado for di trabou.
Kralendijk, Awe mainta Rijksdienst Caribisch Nederland a kita un empleado di departamentu di finansa di RCN for di trabou. Ta sospechá e empleado aki di a pasa informashon na tersernan ku tin benefisio for di esaki. E empleado aki a pidi pa rekompensá personal finansiero na un kompania. Apesar di e echo ku e kompania en kuestion a duna di konosé ku nan no a paga e persona aki, RCN ta haña e komportashon di e empleado aki inaseptabel i a disidí di terminá e relashon di trabou ku e empleado inmediatamente. RCN ta konsiderá eventual otro pasonan.
Ayera maneho di RCN a keda informá di un komportashon inaseptabel di un empleado, manera esaki a keda señalá, inmediatamente a inisiá un investigashon interno rondó di e empleado en kuestion. Awe a konfrontá e empleado ku e pruebanan i a notifik’é di e medidanan a konsekuensia di esaki. Pa gobièrnu di Reino integridat ta di sumo importansia. Gobièrnu mester funshoná di un forma íntegro i mester duna un bon ehèmpel den esaki. RCN lo no desviá for di e prinsipio aki i pa e motibu ei a disidí di terminá e kontrakt ku e empleado konserní inmediatamente.
bai bek ariba
Jopie Abraham a anuncia su retiro como lider di DP.
Salu tin mas valor cu cualke involvimentu politiko.
Pa nos personalmente tabata un sorpresa na momento cu nos a hanja sa cu den e gobiernu cu Athony Nicolaas como independiente, Jopie Abraham a postula su mes como diputado. Nos a pensa dos cos y unu din an ta cu un tempu pasa cu Partido Democratico fuertemente represent den gobiernu Jopie a bai laga e gobiernu den man di poco novato y e resultado a bira conoci despues. E o tro motibu cu nos a pensa tabata cu Jopie mes lo ké ta diputado pa e atende cu e asuntu di structura estatal debi cu Marugia no a resulta loke cu e tabata pensa y alavez controla e forma di traha di Anthony Nicolaas pa no pasa partido un fastbal.
E realidat a bini na nos conocementu na momento cu a duna ordu pa traha su oficina abou y no ariba manera ta e caso cu oficinanan di diputado simper ta ariba for di dia cu e edificio no ta cas di Gezaghebber mas. Esaki tabata tin di haber cu su estado di salú y si awe e ta retira como lider politico nos sit a pone padilanti cu Johan Evert Abraham a realisá cu salú ta más importante cu mortificá bo curpa den politica y mas ainda no tin nada mas pa busca den politica debi cu su contribushon na su manera di mira tabata suficiente. Johan tur cos bon y disfruta awor den ambiente familiar y has bo cura di cas cu algun meter mas haltu di kadushi.
Jopie Abraham ta baha komo lider politiko
Kralendijk 10 di November 2010 - Despues di mas ku 33 anja aktivo den politika di Bonaire bo servidor Jopie Abraham a tuma e desishon ku lo mi no pone mi mes disponel mas komo lider politiko di Partido Demokratiko Boneriano (PDB) pa e proksimo elekshon.
For di ultimo elekshon mi a pone mi funkshon di lider politiko na disposishon di partido i aworaki definitivamente lo mi no partisipa komo lider politiko den e elekshon benidero.
Den konsulta ku frakshon i direktiva di Partido Demokratiko Boneriano (PDB) a keda palabra ku pa fin di siman aki lo atende liderato nobo di partido djaweps den konseho di partido (partijraad) pa yega na nombramentu di un lider politiko nobo diasabra awor den un reunion general di partido na Sede na Entrejol.
Ta e intenshon pa banda di un lider politiko nobo eligi tambe un direktiva nobo pa nos partido pa di e forma aki mesora kuminsa ku un kampanja pa e elekshon di konseho insular dia 2 di maart otro anja.
Mi ta sumamente agradesido na tur esnan ku a dunami sosten i apoyo durante mi karera politiko ku a kuminsa den anjanan setenta i a domina kasi henter mi bida komo adulto. Tabata un honor pa mi por a sirbi mi pueblo den varios funkshon publiko riba nivel insular i federal. Un gradisimentu di kurason.
Atentamente,
Jopie Abraham
Intento di robo di ATM
Kralendijk 10 di November 2010 - Bon Trabou di SSS. ta frustrá forma di destrui propiedat cu a keda introduci oficialmente riba nos isla.
UN PICKUP CU STICKER DI BUDGET A BEK DEN ORANAN DI MARDUGA Y DESTRUI PORTA PRINCIPAL DI WARE HOUSE PA BAI CU E ATM.
E destrucshon tabata asina fuerte cu no por a logra nan meta pa bai cu e ATM for di e supermerc ado. KRALENDIJK: Alarma di Special Security Services a evitá un robo di un ATM den un forma sensashonal. Tabata ayera marduga pa no bisa awe mainta pa mas o menos 02.37 cu ta algu despues di mitar di tres cu un parti di e alarma situa den e supermercado Ware House cu ultimamente tin un atenshon special pa cumpradónan di nos isla, a bai na momento cu un transporte di placa tabata tumando luga di parti di e compania di seguridat S.S.S. di Benito Dirksz.
Rapidamente y por bisa dentro di 6 minuut e patruya di transporte di placa aki a presenta na e sitio y a tuma nota cu un destrucshon di e porta principal di e warhehouse a tuma luga. A pone polis na altura di e situashon y tambe e donjonan di e empresa. Mester bisa cu den menos cu algun minuut un patruya di polis a presenta na e sitio caminda cu un investigashon preliminar a tuma luga.
A keda detectá pa medio di grabashon interno cu e acto di destrucshon cu intenshon serio di robo a haci uso di un pick-up cu un sticker di e compania di huur Budget riba dje (probablementehortá) A bek e vehiculo aki cu sierto velosidat contra di e porta principal y a basha esaki abou por completo. E acto aki no a duna resultado pa loke tabata intenshon di e dos ladronnan di cua unu ta cu carson corticu y visiblemente pa por detecta kende e ta y tambe su companjero, debi cu e porta grandi cu tralie pisá a cai pa nan mala suerte net caminda cu e mashien di ATM tá y no por a bai cu esaki.
E situashon di frustrashon aki lo mester a conduci na e hecho cu nan a bati retirada den e pick-up. E operashon aki mester a sosode dentro di 5 minuut of algu mas, igual cu tabata e caso di e mes un forma di operashon aki Electronica Santana. Den oranan di awe mainta lo bai na studia e grabashon pa asina pone man riba esnan cu ta den e tipo di oprashon di destrucshon cu intenshon di robo aki.
Komunikado Fundashon Sebiki
Kralendijk, Voluntarionan di Fundashon Sebiki huntu ku BJZ i Happy People ta organisá e evenemento di mas grandi pa nos muchanan di Boneiru, esta e yegada di Sanikolas. No ta falta masha pa e hòmber santu yega Boneiru: yegada ta djasabra 27 di novèmber atardi. Manera semper Sebiki tin un mini feria ku diferente wega pa tur mucha, kuminsando for di 2’or atardi den Parke Wilhelmina.
Kòrda bin buska bo T-shirt ku diseñonan bunita pa bai risibí Sanikolas. T-shirt ta optenibel na Sebiki na preis di Naf 8,50 i alabes bo por partisipá na nos konkurso di klùr.
Ya pa basta aña e aktividat aki ta wòrdu organisá pa voluntarionan i donashonnan ku Sebiki ta risibí ta hasi e aktividat posibel. Nos ke hasi un apelashon riba komersiantenan pa un donashon pa por realisá e festividat aki: por ta saku di mangel, adorno, blas, refresko, regalonan chikitu i boluntario. Tur donashon i aporte ta bonbiní!
Pa mas informashon i donashon por tuma kontakto ku Fundashon Sebiki na 717-2436.
Chapi di luch
AWE TA DIA DI CHAPI DI LUCHA CU TA WORDU ENTREGA NA ESNAN CU ENBERDAT A Y TA LUCHA PA MANTENE SINDICALISMO NA BIDA Y TAMBE ESNAN CU A Y TA LUCHA PA MANTENE NOS CULTURA NA BIDA.
Awe conforme un invitashon di SKAL lo bai tin pa e di tantisimo biaha conforme un lantamentu di hendenan(katibunan di gobienru) oprimi pa nan derecho. Un lantamentu di katibu conforme e historia e chapi d lucha lo bai na conmemora e lantamentu di katibu aki. For di historia cu no a wordu confirmá legitimamente nos ta comprondé cu tabata riba e fecha di 10 di November na anja 1834 cu riba e fecha ey den e anja menshona bou di guia di Martis di Katalina Janga, algun katibu di gobiernu a lanta contra di nan donjo pa prostesta contra maltrato cu nan tabata sufri na man di nan bomba.
Un reconosimentu asina mester wordu evalua den un comishon separá for di Skal y aprobá pa cualké gobiernu cu ta den siya. Den e presentashonnan anterior pa loke ta cultura nos a sinti falta di e number di Papy Cicilia, Janchi Janga no solamente den cultura, promoviendo cultura , pero un di e hendenan cu a principia Sindicalismo no na Boneiru so pero na Corsow debi cu ta Bonerianonan a principia sindicalismo tantu na Aruba (Jasintho Chintu Diaz ) y na Corsow. Den sindicalismo for di dia cu e Chapi aki a keda introduci nos a sinti falta di un otorgashon na un persona cu ketu bai ta lucha pa mantene un sindicato na bida contra ola y mareo y en particular un edificio cu awendia e contribushon di miembronan ta imposibel pa mantene e edificio aki den un estado pa e no cai den otro.
Nos a sinti falta di un reconocimentu di un Jantje Landwier y no di esnan cu a lanta un sindicato pa finnan politico y despues a bira lomba bai y last but not least di un Ewald Abdul cu a para na cuna den bicendario di Teatro Carib, penshon Reina, huntu cu companjeronan di Corsow, mas despues cu Lan Statie, hendenan cu for di un principio mester a hanja e reconosimentu pa un Chapi di Lucha. Nos lo bai tuma nota e biaha aki cu atrobe tin patronashe politica den e reconocimentu aki. Nos no ta serio den e asuntunan akiy prueba di esaki ta cu riba dia di Boneiru Papy Cicilia den e barrio caminda cu su lombrishi ta derá y cu no por saca esaki ni cu caterpilá patronashe politico ta laga tur hende compronde e motibu cu E no por bira ciudadano di honor.
Honor na ex diputado Nochi Willem cu na momento di introducshon di Ciudadano di Honor a scohe Constantino Doeiz Diaz, jui official, legitimo di Ma Nini cu awendia su tienda a wordu converti den apartamentunan na Sabana como e ciudadano di honor den Parke Wilhelmina, ora cu nos por hinca nos man den candela cu nunca Doei a vota ni lo a vota pa Nochi Willem. Tabata mas corecto pa SKAL a saca e lista ta kende a hanja reconocimentu caba y pa tal rason bienposibel nos lo por a haci menshon di nombernan cu lo a hanja un reconosimentu caba. Arthur Sealy cu ta historiadó sigur no a hanja e honor aki ora cu otronan si a hanja y hasta den promé tanda.
No tin polis riba caya den oranan de madruga.
Kralendijk 10 di November 2010 - E hefe local di Polis si e ta wordu reconocé ainda den e constelashon, construcshon nobo di un cuerpo di polis cu ta cai bou di Hulanda, mester haci recomendashonnan cu sigur den oranan di marduga, esta durante di e servicio cu nan ta jama “Hondenwacht”cu ta sea subi 11ór di anochi of 12ór di anochi y baha 7ór of 8ór cu tin patruya di polis riba caya. Patruya di polis den centro di Kralendijk, Patruya di polis cu ta pasa na altura di supermercadonan cu ta keda pafo di Kralendijk debi cu tur actonan criminal y sigur destrucshon di propiedatnan pa comete robo, ta tuma luga entre 1ór di marduga pa 4ór di anochi.
Esey a keda comprobá y un bon polis sa esey tambe. E orarionanpa comete robo den oranan di anochi, madruga ta igual cu e orario ora cu ta tumba un gobiernu den paisnan di central y Sur America. Prueba di esaki ta e actonan di robo riba empresanan cu ta tuma luga pa medio di destrucshon hacienda uso di vehiculonan. Otro prueba ta cu mando di polis sa bon bon cu den weekend tin sitionan di dibertishon cu ta serra 3ór di marduga y no ta pasa ningun patruya na e momentonan ay. Fin di siman pasa a tene tur sorto di fever tantu riba Caya Kachi Craane y Caya Grandi y hasta un caballero a cai for di su motocycle cu no tabata falta muchu cu auto lo a pasa riba dje.
FFB ta exclui nos for di informashon di torneo clasificarorio.
Ta notabel debi cu den seno di Federashon di Futbol Boneriano no tin hende cu ta laga sano juicio prevelá, no ta manda informashon ni sikiera cu ta bai tin un torneo clasificatorio pa mundial U-20, te pa nan manda un schedule di e weganan cu tabata bai tuma luga riba nos isla y ta tumando luga riba nos isla. E torneo aki a jega Boneiru no pa esfuerso di FFB, sino pa un forma con ta cohe macabu cu un bacoba masha grandi mes. E miembronan di FFB cu a jega ayera den deporte y sigur den futbol organisa ta lubida cu nos network y nos aseso na tur informashon di FIFA ta pone nos na altura di tur loke cu ta pasa den futbol mundial y regional cu ta cai bou di FIFA.
Tempu cu nos abisa cu e structura e bira d ital forma cu Concacaf cu tin e mes un presidente cu CFU. Ta laga CFU organisa tur torneo cu anteriormente CONCACAF tabata organisa y justamente Boneiru mester bira miembro di CFU y reclama su patrimonio cu mester wordu comparti cu FFB y FFK debi cu ta miembro di NAVU y proyectonan y FIFA AID ta destina pa NAVU cu tin cu comparti esaki cu su dos unico districtonan. Ta un berguensa pa motibu di un situashon actual bandera di FIFA ta bula na e altura mas haltu di Stadion y esun di Boneiru, ora cu Boneiru no ta miembro di FIFA , ni tampoco ta miembro di CFU. Ta tumamento di hende haci CABEI cu na presentashon di e seleecshon di Antia, ta canta himno di Corsow y despues himno di Boneiru. Na fabor di nos aletanan nos ta laga e situashon té akinan y esnan cu tin miedu pa un informashon mas aleeuw por ta tranquilo debi cu si clubnan mes ta guli e bacoba presentá , nan lo tin e derecho pa haci esaki.
Politiconan conoce municipio di Rincon solamente den tempu di elecshon.
Un recorido cu nos a haci recientemente den e municipio di Rincon, e cuna di cultura di nos isla, nos a tuma nota cu politiconan y sigur den e ultimo campanjanan electoral cu a tuma luga conoce e municipio aki bon bon, den oranan di atardi, den oranan di anochi y tambe den oranan di marduga caminda cu diputadonan, ex diputadonan ta camna bati porta y ofrese nan servicio debi cu e otronan a descuida y lubida riba Rincon. Ora cu campanja pasa y e resultado ta decepshonante pa esnan cu a feila nan las y cansa nan rosea, dato piscadera municipio di Rincon. Den nos proximo edishon nos lo laga bo mes comprobá loke cu nos ta scirbi.
