Asistensia consular na Bonairu pa imigrante Komunikado de prensa di K.P.N.A. Link - Invitashon Ban Bonairu Bèk! Komunikado ban yuda nos rumannan Komunikado Rijksdienst Carïbisch Nederland Entrega Chapi di lucha Karta di 6 klup pa direktiva di FFB Komunikado pa prensa di HiB
Asistensia consular na Bonairu pa imigrante.
Kralendijk, Hopi imigrante tin problema grandi pa konseguí e dokumentonan ku nan mester pa pidi òf renobá pèrmit di estadia. Ta hopi kostoso tambe pa buska e dokumentonan aki for di nan pais di orígen, na Caracas (pa diferente nashonalidat), òf den sierto kaso na Kòrsou. Ta p’esei Partido pro Hustisia & Union (PHU) a inkluí den su maneho di imigrashon pa solushoná òf sikiera mehorá e situashon aki.Esei lo wòrdu hasí por lo ménos na e siguiente dos manera:
1) Via RCN (gobièrnu di Hulanda i kisas Ombudsman) lo organisá ku e rekesitonan ta bira mas rasonabel. Por ehèmpel, una bes ku gobièrnu a risibí un akta di nasimentu verifiká di un imigrante, NO ta nesesario pa bolbe pidiele pa e entregá un akta asina. Un hende ta nase solamente un biaha. E rekesito pa entregá un akta nobo kada biaha ta renobá su pèrmit di estadia, ta un di e trukonan falsu ku ta wòrdu usá pa deskurashá imigrante pa pidi nashonalidat Hulandes.
2) Lo tuma kontakto ku representante consular di diferente pais, manera Colombia, Perú, Sto. Domingo, Sürnam i - si ta posibel - asta China, India i Estados Unidos, pa pidi nan mehorá nan servisio consular na Boneiru. Lo ofresé nan espasio na ofisina di gobièrnu di Boneiru, kaminda nan por manda un representante consular, por ehèmpel, un òf dos biaha pa luna pa atendé ku nan kompatriotanan na Boneiru.
bai bek ariba
Komunikado de prensa di K.P.N.A.
Boneiru, djarason 10 novèmber 2010
Ladronnan ta intentá di bai ku mashin di plaka.
Djarason banda di dos or di mardugá patruya a keda dirigí na Warehouse supermarket kaminda ku un patruya di un kompania di seguridat a konstatá ku deskonosínan mester a intentá pa basha e porta di entrada abou hasiendo uzo di un pikòp. Na yegada di polis a konstatá ku e malechornan a logra na kibra e hèkwèrk ku tabata dilanti na e entrada. Segun investigashon preliminar e delinkuentenan a trata di bai ku e bankomátiko den e supermerkado. Esaki no a logra. Algun ratu despues polis a risibí un yamada ku a haña un pikòp den e bario di Tera Kòrá. Polis ta investigando si e vehíkulo ta involukrá den e intento di kiebro na Warehouse. Departamento di reshèrshi i reshèrshi tékniko ta investigando e kaso.
Invitashon Ban Bonairu Bèk!
Clik riba e log di Ban Bonairu Bèk!
Komunikado ban yuda nos rumannan
Nos hermana pais Kòrsou su habitantenan a sufri hopi daño material ku pasada di tormenta tropikal TOMAS siman pasá.
Pa tal rason FUNDASHON KORSOU UNI DEN KOPERASHON KU GOBIERNO DI BONEIRU, KRUS KORA I LIONS CLUB BONAIRE, ta organisá djabièrnè awor 12 di novèmber 2010 un Mediatòn pa rekoudá fondo pa tur esnan ku a sufri daño.
Un súplika ta bai na tur medio di komunikashon soshal aki na Boneiru pa duna publisidat na e megatón aki, miéntras ta pidi tur radio i televishon tantu aki komo na Kòrsou pa transmití e megatón bibu i direkto for di Plasa El Mundo den sentro di Playa. E meidatòn lo kuminsá pa sink’or di atardi i lo dura te ku 10’0r di anochi
Tur esnan ku di kurason kier kontribuí ta mas ku bon bin i ku e montante ku nan por sea hopi o tiki tur kontribushon ta bálido i di apresiá. Por pasa personal na Plasa El Mundo nét dilanti Tante Vita i hasi bo donashon.
Tambe por hasi donashon na: Maduro & Curiel’S Bank riba kuenta di Krus Kòrá nr, 400-62008 òf na RBTT-Bank riba kuenta di Krus Kòrá nr, 180-81053.
Fundashon ta hasi un yamada pa nos ta generoso ku nos kontribushon i for di awor ta yama un danki sinsero, tambe na nòmber di Gobièrno di Boneiru, Krus Kòrá i Bonaire Lions Club. M. Maduro Presidente.
Komunikado Rijksdienst Carïbisch Nederland
KOMUNIKADO PA PRENSA – 10 di novèmber 2010
Kralendijk, 10 november 2010
Enseñansa avansá ta di hopi importansha pa desaroyo di hóbennan y pa Boneiru. Ta pa esei Finansiamentu di Estudio ta nesesario pa duna hóbennan e chèns pa studia. Rijksdienst Caribisch Nederland-Unit Studiefinanciering ta organisá un anochi di informashon tokante di Finansiamentu di Estudio, djaluna anochi, 15 di novèmber. RCN-Unit Studiefinanciering ta invitá tur studiante y nan mayornan pa ta presente.
Durante di e anochi aki, funshonarionan di e Unit Studiefinanciering y di ‘Dienst Uitvoering Onderwijs’ for di Hulanda, lo duna splikashon tokante di kiko e sistema nobo di finansiamentu di estudio ta enserá i kon pa yega na remarke pa esaki.
Ora di kuminsá ta 8 or pm, e anochi di informashon lo tuma lugá den e aula di SGB.
Entrega Chapi di luch
Diputado James Kroon a haci entrega di Chapi di lucha….
NILCO ROLLAN COMO SINDICALISTA Y PAPI CICILIA, E HOMBER DI CULTURA DURADERO.
Den pitu Papi Cicilia a haci entrega di su buki “Pos di Amor”na Gezaghebber Thode.
KRALENDIJK: Ayera nochi den centro di barrio Nikiboko tabata un anochi festivo pa dos persona cu e anja aki a bini na remarke pa ricibi e reconocimentu den forma di e chapi di lucha, conmemorando e lantamentu di katibu riba e fecha di 10 di November 1834 cu a tuma luga den e region di plantage Fontein.
E lantamente aki tabata bou di guia di Martin di Katalina Janga, na momento cu algun katibu di gobiernu a lanta contra di nan donjo pa protesta contra maltrato cu nan tabata sufri na man di e bomba. E servicio di Educashon y Cultura teniendo na cuenta cu e lantamentu aki tabata tin di hamber cu nos historia cultural combina cu salimentu di interes pa e trahadó cu otorgamentu di e award Chapi di Lucha ta conmemorá e echo memorabel aki.
Den presencia di nos promé mandatario y sra. Diputado Elvis Tjin Asjoe y directora di T.C.B. Ronella Tjin Asjoe y naturalmente e hefe di Skal Hubert Vis, diputado James Kroon despues di a ilustra e trabounan cu e dos personanan a haci pa nos comunidat, gradiciendo nan pa nan dedicashon y tambe pa e forma con nan familia a sostene nan den e trabou cu nan a haci , e entrega a tuma luga, primeramente na Nilco Rollan, presidente di e sindicato AFBW y mas despues na Papi Cicilia cu awendia ta penshonado despues di mas cu 40 anja di trabou na gobiernu.
Ambos persona a tene nan discurso di gradicimentu ora cu Papi Cicilia na final di su discurso a haci bon uso di e oportunidat pa haci entrega di su buki “Pos di Amor”na nos promé mandatario.
Karta di 6 klup pa direktiva di FFB.
Na: Direktiva di Federashon Futbòl Boneriano (F.F.B.)
Tópiko: Kampeonato 2010 – 2011
Kralendijk, 10 novèmber 2010.
Pa medio di e karta aki firmantenan kier aserká direktiva di Federashon Futbòl Boneriano (F.F.B.), pa lo siguiente.
1) Manera ta konosí kampeonato di futbòl 2010 – 2011 organisá pa F.F.B., ta programá pa inisiá djadumingu awor 14 novèmber 2010.
2) Den reunion di 26 di òktober 2010, a palabrá ku direktiva di F.F.B. ta dirigí un partisipashon ofisial na klupnan miembro, ku e diferente detayenan ku mester ta reglá promé ku inisio di kampeonato 2010 – 2011. Esaki entre otro mester a enserá, inskripshon i traspaso di hungadónan. Entretantu faltando apénas kuater (4) dia pa inisio di kampeonato, ainda klupnan no a risibí e partisipashon ofisial en kuestion.
3) Informashon ku nos ta disponé di dje ta indiká ku faltando apénas kuater (4) dia pa inisio di kampeonato 2010 – 2011, ofisialmente ainda direktiva di F.F.B. no reuní ku FEREBO, kual ta e federashon di rèfrinan boneriano.
4) Informashon ku nos ta disponé di dje ta indiká ku faltando apénas kuater (4) dia pa inisio di kampeonato 2010 – 2011, ofisialmente ainda direktiva di F.F.B. no reuní ku Komishon di Kastigu.
5) Informashon ku nos ta disponé di dje ta indiká ku faltando apénas kuater (4) dia pa inisio di kampeonato 2010 - 2011, ofisialmente ainda direktiva di F.F.B. no a pone esnan responsabel ku maneho di Stadion di Kralendijk, na altura tokante di e kampeonato.
6) Fuera di puntonan ariba menshoná, ta keda tambe e echo ku ainda no tin klaridat pa loke ta futuro afiliashon internashonal di futbòl boneriano.
Despues di analisá puntonan ariba menshoná, nos a yega na siguiente konklushon i desishon;
1) Den un situashon asina, no ta konsehabel i te hasta iresponsabel pa inisiá ku un kampeonato ofisial di F.F.B. (situashonnan similar di pasado a prueba esei)
2) Nos ta ordená direktiva di F.F.B., pa kanselá inisio di kampeonato boneriano di futbòl 2010 – 2011, dia 14 di novèmber binidero, esaki pa un tempu indefiní.
Petishon pa reunion: Pa medio di esaki nos kier hasi tambe un petishon na direktiva di F.F.B. pa mas pronto posibel, yama un reunion general ekstraordinario ku klupnan miembro. Riba agènda di dicho reunion sigur mester aparesé siguiente puntonan;
* Aprobashon di nótulonan di reunionnan di 21 i 26 di òktober 2010
* Funshonamentu general di direktiva di F.F.B. * Futuro afiliashon internashonal
* Tur detaye relashoná ku kampeonato 2010 – 2011
Sperando di por a informá sufisientemente i di pronto risibí un reakshon, nos ta tèrminá.
Atentamente,
Presidente; S.V. Estreallas Presidente; S.V. Uruguay ___________________________ ________________________ Hubert J. Pikeri Edsel R.F. Chirino Presidente; S.V. Vitesse Presidente; S.V. Atlétiko Flamingo ________________________ __________________________________ Ismaël M. CCicilia John E.L. Leoneta Presidente; S.V. Ariba Perú Presidente; S.V. Atlétiko Tera Corra ___________________________ ____________________________________ Reinereo Cueva Diaz Frensel J.Janga
Komunikado pa prensa di HiB
Arthur Rosaria, Milangelo Isidora, Jhonny Lake, Cedric Leona, i MCB den Hoyer in Business Willemstad – Djaweps 11 di novèmber Hoyer in Business lo tin invitadonan interesante atrobe den su adrei, sala, balkon i riba stupi.
Den Adrei Arthur Rosaria (direktor di Korpodeko) lo elaborá riba e fondo pa empresarionan ku a sufri daño kousá pa e tormenta tropikal Tomas, den Sala Milangelo Isidora, Jhonny Lake i Cedric Leona lo konta tokante di nan empresa nobo i inovativo riba tereno di konstrukshon, den Balkon Gachi Zimmerman di Blue Factor lo presentá un solushon pa e situashon di plaka kèsh nesesario pa fin di aña i finalmente riba stupi Yolène Felipa di MCB lo duna informashon tokante di riesgonan ku empresanan chikí i mediano ta topa kuné.
E intenshon tabata pa Gilbert Martina, presidente di Asosiashon di Seguronan, tambe t’ei den e programa pa duna tur detaye tokante daño okashoná pa e tormenta tropikal Tomas i e ròl ku seguro lo hunga den solushon di e situashon indeseá aki. Sinembargo inesperadamente Gilbert Martina mester a hasi un biahe pa eksterior. Bibu for Netto Bar Transmishon via di Radio Hoyer 1 ta djaweps atardi di mitar di seis pa shet’or, bibu for di Netto Bar, den Kaya Grandi di Otrobanda. Presentashon ta den man di empresarionan Jefka Martha-Alberto i Clifton Wallé. Sintonisá, pasó e programa ta Pa Bo!
