Komunikado pa prensa Openbaar Lichaam Bonaire Komunikado pa prensa Scouting Bonaire Komunikado pa prensa Openbaar Lichaam Bonaire II Comishon referendem Manjan ta dia di Robert Dos barcu crusero den haf Combinashon MCB y Funmiles lansando Maestro EMV Smart Card Loke a pasa na Boneiru
Komunikado pa prensa Openbaar Lichaam Bonaire
ING ELVIS TJIN ASJOE GEZAGHEBBER INTERINO
Kralendijk - Djaweps 11 di novèmber 2010 a huramentá komo Gezaghebber Interino sr. ing. Elvis Tjin Asjoe.
Riba e foto aki por mira promé mandatario sr. mr. dr. Glenn Thode den presensia di Gezaghebber interino sr. ing. Elvis tjin Asjoe
For di 10 di òktober gobernashon di Boneiru ta reglá den WOLBES. Den WOLBES artíkulo 90 insiso 1 tin skibi ku huridikamente no por tin un situashon ku un miembro di Konseho Insular ta ehersé e funshon di Gezaghebber. Un miembro di Konseho Insular si por ehersé e funshon di Presidente di Konseho Insular. E no por vota konhuntamente den Konseho na ora di tuma desishonnan o un Ordenansa ku bini for di Konseho Insular, miéntras un hende ta den funshon di Gezaghebber i e mes mester proklamá un Ordenansa. Den e kaso aki Kolegio Ehekutivo a nombra un diputado ku no ta un miembro di Konseho Insular, ku tin eksperensianan amplio riba tereno Gubernamental i ku un karisma konfiabel. Kolegio Ehekutivo ta brinda stabilidat na e opservashon (waarneming) dor di asigná te na momentu di entrada di un Kolegio Ehekutivo nobo despues di elekshon di 2 di mart 2011.
Den kuadro di integridat di e funshon di gezaghebber lo laga “screen” e diputado ku ta drenta den e funshon di gezaghebber interino konforme e artíkulo 91 di WOLBES.
E huramentashon di gezaghebber interino sr. ing. Elvis tjin Asjoe a tuma lugá den e ofisina di su promé mandatario sr. mr. dr. Glenn Thode den presensia di Gezaghebber i Sra. mr. Nereida Gonzalez , sekretario di Teritorio Insular di Boneiru.
bai bek ariba
Komunikado pa prensa Scouting Bonaire
Scouting Bonaire ta sede di Koempoelan 2010
Willemstad, Koempoelan 2010 ta na kaminda pa ser realisá den wikent binidero di 12 pa 14 di november 2010 na Bonairu.
Koempoelan ta un evento kaminda lidernan di e organisashonnan hubenil uniformá ta bini huntu durante un fin di siman pa evaluá e aña ku a transkurí i interkambiá idea riba desaroyonan ku Scouting tin riba nivel nashonal i mundial. Tambe lo trata e diferente temanan di aktualidat, desaroyonan ku tin riba tur nivel, i ku tin influensha riba funshonamentu di nos gruponan hubenil uniformá riba kada unu di e Islanan.
Kada aña di nobo, Koempoelan ta wòrdu organisá na un di e islanan di Korsou, Bonaire, St. Maarten of Aruba. E aña aki nos isla di Bonaire ta sede di e magno evento aki, ku lo tuma lugá den e wikènt benidero dianan 12 te ku 14 di Novèmber 2010 na Rincon i Playa.
Tema di e Koempoelan e aña aki ta: “Komo Scout nos ta keda ruman pa semper” E kompromiso aki ta esun ku nos komo scout a hasi ora nos a huramentá komo miembro di nos organisashon di Scout, esta di SIRBI DIOS i PAIS i keda ruman ku otro ounke nos islanan di Antias i Aruba a separá for di otro.
Dedikatorio di koempoelan. Tur aña di nobo koempoelan ta dediká na un persona ku a destaka riba un dje diferente islanan. E aña aki un lider inkansabel di Bonaire Alfred Koeks ta esun ku Koempoelan 2010 ta wòrdu dedika na dje. Esaki pa su trabounan na bienestar di Scoutismo den grupo “That It” na Rincon. Pabien na Alfred pa e sigui ku e bon trabou i sigui mantene e espiritu di scouting serka e hóbennan di Rincon i di Bonaire engeneral.
Apertura Ofisial di koempoelan lo tuma luga djasabra mainta dor di Gezaghebber i diputado di e isla, na Mangasina di Rei.
Di parti di Scouting Antiano, ku ta yuda kordina i sostené e aktividat aki, un deseo di eksito pa ku e koempoelan aki na Boneiru i ku tur nos rumannan scout di Aruba, Bonaire, Kòrsou i St.Maarten lo sali ku hopi kuminda pa un aña nobo eksitoso di scouting.
Na nòmber di e komishon: Alto Komisario di Scouting Antiano Frendsel “Pappy” Lacruz Tel. 561-6150 òf 568-3040
Ta firma Hopman Theo Vos
Komunikado pa prensa Openbaar Lichaam Bonaire II
DIPUTADO TJIN ASJOE KONTENTU KU PAGO DI SALARIO NA PERSONAL DI METEO BONEIRU
Kralendijk - Diputado Elvis Tjin A Sjoe ta hopi kontentu ku trahadónan di meteo a kobra nan salario di luna di òktober 2010 despues di mas o ménos 2 siman.
Riba e foto aki por mira gezaghebber interino sr. ing. Elvis tjin Asjoe
Tjin -Asjoe ta lamentá ku desmantelashon di Antia a trese molèster pa empleadonan ku mester a pasa over pa otro entidatnan. Pa empleadonan di Meteo manera ya ta konosí tabatin palabrashon ku nan lo a pasa pa e servisio na Kòrsou. Lamentablemente e parti hurídiko no a keda kla pa asina nan por a kobra manera tur otro empleado ku ta presta labor pa nan sèn di luna. Problemanan a surgi na momento ku den e proseso di desmantelashon e trahadónan di Boneiru no a haña oferta di trabou. E trahadónan a aserka RCN i esaki a splika nan ku ta Kòrsou mester atendé nan asuntunan. Aki diputado Tjin- Asjoe a reuní ku direktor di meteo Kòrsou señor Martis pa huntu wak kon por yega na un solushon duradero pa e trahadónan aki. Ta esfuerso di tur hende a buta ku nan por a risibí nan pago e siman aki. Loke ta keda ainda pa traha riba dje ta e parti hurídiko kaminda e trahadónan ta haña pretu riba blanku ken ta nan doño di trabou. Hulanda, Kòrsou i Antia a firma un protokòl di koperashon entre ministerio de tráfiko Hulandes, ku minister di transporte di Antia huntu ku gobièrnu di Kòrsou. A palabra den e protokòl ku ta duna mas kontenido na e proseso pa yega na e ‘rechtsopvolger’ di servisio meteorológiko teniendo kuenta ku e trabounan ku mester tuma lugá pa islanan Boneiru , Statia i Saba. Diputado Tjin-Asjoe lo sigui e desaroyonan i hasi tur loke ta na su alkanse pa yuda den e proseso pa finalisá tur loke e empleadonan di meteo tin derechi di haña sa pa asina nan por sigui duna nan servisio na komunidat Boneriano.
Comishon referendem
Ta solamente 5 siman a keda pa comishon di referendum duna informashon objetivo…
PA MEDIO DI 3 BOLETIN LO BAI INFORMA PUEBLO RIBA REFERENDEM 17 DI DECEMBER AWOR.
Oficina di referendem lo ta habri den e business centrum Prive Pró den caya grandi: 7178848
KRALENDIJK: No obstante cu lo mester tin un periodo di por lo menos 7 pa 8 siman di informashon promé cu un pueblo participa na un referendum y sigur un referendem cu tin di haber cu futuro di un pueblo, e biaha aki despues cu a bini un cantidat substanshal di preocupashon cu ainda no tin informashonn na pueblo, a keda splica den curso di ayera cu ta bai cuminsa cu informashon.
E informashon na pueblo pa loke ta publisidat lo bai tuma luga den tres boletin cu e comishon lo bai emiti. For di cuminsamentu di otro siman e promé boletin lo ta den sirculashon caminda cu ta informa nos pueblo tocante di e identidat cu nos isla a drenta den dje for di dia 10 di oktober 2010 ultimamente. Fuera di e splicashon aki lo mustra riba e contenido di e referendum muy en particular e pregunta cu ta bai ser haci na momento cu e pueblo mester vota Si of NO. E pregunta aki ta basá riba e hecho cu si bo ta di acuerdo cu nos isla di Boneiru a bira un identidat public conforme articulo 34 di e ley primordial di Hulanda, e asina jamá grondwet.
E di dos boletin cu lo sigui despues lo ta pa encurashá tur hende pa nan haci uso di e derecho di voto riba e fecha di 17 di December awor.E ultimo boletin lo tin di haber cu un resumen di e promé dosnan resumiendo e importansha di e referendem. Separadamente for di e boletinnan aki lo bai haci uso di medionan di comuncashon, presentashon den centronan di barrio riba nos isla y un oficina cu ta duna informashon na esnan cu ta pidi pa esaki. E posibilidat tey tambe pa riba petishon di gruponan cu mester ta consisti di por lo menos 15 persona, miembronan di e comishon lo duna informashon. For di dialuna awor e oficina di referendem lo ta den funcshon y esaki ta keda den caya grandi den e centro di negoshi di Prive Pró y enumber di telefon lo ta 717.8848.
Manera cu por a compronde a mantene Douwe Boersema como president di e comishon y aparentemente pastor Ramiro Richards ta vocero di e comishon aki. No a ser menshoná cu e montante gordo cu a wordu pone na disposishon di e comishon anterior cu si e placa aki a keda intacto y cu e president ta cobra por lo menos 450 florin pa cada ora di trabou.
Manjan ta dia di Robert
MAJAN TA DIA DI ROBERT Y FOR DI AWE E TA OCUPA CU DOS BARCU CRUSERO Y TIN BRINDIS CU BOLO NA PIA DI WAF.
Majan ta dia di Robert pero ta for di awe e ta selebrá teniendo na cuenta cu nos tin no menos cu dos barcu crusero den nos haf. Oceania a drenta mainta tempran y un ratu despues pa di promé biaha Grandeur of the seas cu por sierto ta un barcu cu e mes un calidat di toerista na bordo cu Enchantment of the seas tabata tin. Majan Robert ta jega e edat di dobbel sincu, cu ta un number cu a bira loco for di e siman aki ora cu dobbel seis, dobbel cincu y dobbel siete tabata den tapara. Na Hulanda nan a dal un bitter caba riba e cumpleanjo di Robert debi cu no por warda te majan. Na Tilburg tin un selebrashon sigur y lo tin un bon weya di soppi cu a bai candela for di mardugá. Ae lo tin un tiramentu di douw na waf tambe pa mira of hanja sa ta kende ta bai bira e director o directora nobo di oficina di toerismo.
Dos barcu crusero den haf
AWE NOS TIN DOS BARCU CRUSERO DEN HAF PA UN TOTALIDAT DI 6 MIL TOERISTA CRUSERO.
For di den oranan di marduga por a tuma nota cu taxistamam a stashona nan autonan na pia di waf Chicu Mercelina y tambe esnan cu tin un autobus y taxinan auxiliar manera cu nan ta jama nan awendia. Hopi movishon tambe na e waf di Eneca pa asina por tin servicio na e otro barcu cu a drenta djis tras di Oceania. Ta di lamenta pa mira cu nos mes hendenan ta reclama pa loke ta trabou y si bo tira un bista dor di awe mainta e mobilisashon pa duna servicio ta totalmente serca di e Hulandes Europeonan miho conoci den boca di pueblo como Macambanan.
Den tur skina e macambanan ta y criativamente ta bini cu tur sorto di servicio na fabor di e toeristanan crusero. Un cantidat di servicio cu nos mes hendenan por duna pero a laga e mercado aki habri y macambanan a bula aden den un forma masha agresivo mes. E forma con ta bende tour na pianan di waf no ta un presenashon corecto den nos wowonan y sigur ora cu e presentashon aki no ta di nos mes hendenan. Nos hedenan ta drumi, pasobra nan mes por ofrese tur e servicionan aki pero lamentablemente nan ta den man di e macambanan cu dia pa dia ta bira aun más fresco tambe den forma di dit eiland is van ons.
Combinashon MCB y Funmiles lansando Maestro EMV Smart Card
Ayera tardi a tuma luga una cto commercial cu ta expandé popularidt di fund Miles na momento cu den un ambiente di sosio cu Maduro & Curiels Bank Boneiru a landa su Maestro EMV Smart Card cu riba su mes ya caba ta un propaganda no paga pa hener nos isla di Boneiru si tuma nota di e bistanan bunita di nos isla cu ta aparese riba e tarjeta aki cu realmente ta Smwart. E combinashon aki ta amplia e cantidat di empresanan caminda cu bop or haci uso di e tarjeta aki. No menos cu 13 empresa ta afilia na e momentonan aki y na momento cu e campanja promoshonal aki termina por tin sigur cu e cantidat ta bira hopi mas tantu.
Den un ambiente festivo ayera tardi Evert Piar managing director MCB , Boneiru a enfatisá riba e techologia moderno cu no ta para ketu pero ta dinamico den cua entre otro Chip ta crea posibilidatnan grandi , manera entre otro resistensia contra copiamentu di tarheta, pero tamb e ta expandé e area di aceptahon di e tarheta. E tarheta Bancomatico ”Chip” ta wordu aceptá pa pagonan den muchu mas pais den exterior, especialmente Europa. Tur esaki a ser haci posibel dor di e technologia jamá EMV, cu ta un plataforma combiná cu Europay, Mastercard y Visa a introduci.
Loke a pasa na Boneiru
ATA NOS AWE RIBA E DIA INTERNASHONAL DI BULA AFO.
Si ainda bo no ta realisá cu awe un biaha mas nos ta selebra un dia internashonal di bula afó, bo ta djis corre cantu di laman den oranan di awe tardi y e cantidat di hende tantu homber como muhe na altura di Karels Beach y City ta ponébo realisa cu heap, awe ta diabiernes atrobe. Tin un falta di e ambiente di mariachi si riba tur diabiernes na Karels Beach y mala lenganan ta bisa cu awor cu Libier a bira milyonario debi cu e la bende su cas pa macambanan traha un prison cu ta na disposishon di no solamente Boneiru pero tambe na disposishon di Saba y St. Eustatius. En todo caso un feliz dia, atardi, anochi, mardugá chiki, mardugá grandi di bula afó y corda ora cu bo jega bo cas mes mes na momento cu solo ta sali of a sali caba, si bo tin cacho na cas, ta e bestia aki so so ta contento cu porfin bo a jega.
